verba Amos qui fuit in pastoralibus de Thecuae quae vidit
super Israhel in diebus Oziae regis Iuda et in diebus Hieroboam
filii Ioas regis Israhel ante duos annos terraemotus
et dixit Dominus de Sion rugiet et de Hierusalem dabit vocem
suam et luxerunt speciosa pastorum et exsiccatus est vertex
Carmeli
haec dicit Dominus super tribus sceleribus Damasci et super
quattuor non convertam eum eo quod trituraverint in plaustris
ferreis Galaad
et mittam ignem in domum Azahel et devorabit domos Benadad
et conteram vectem Damasci et disperdam habitatorem de campo
Idoli et tenentem sceptrum de domo Voluptatis et transferetur
populus Syriae Cyrenen dicit Dominus
haec dicit Dominus super tribus sceleribus Gazae et super
quattuor non convertam eum eo quod transtulerit captivitatem
perfectam ut concluderet eam in Idumea
et mittam ignem in murum Gazae et devorabit aedes eius
et disperdam habitatorem de Azoto et tenentem sceptrum de
Ascalone et convertam manum meam super Accaron et peribunt
reliqui Philisthinorum dicit Dominus Deus
haec dicit Dominus super tribus sceleribus Tyri et super
quattuor non convertam eum eo quod concluserint captivitatem
perfectam in Idumea et non sint recordati foederis fratrum
et emittam ignem in murum Tyri et devorabit aedes eius
haec dicit Dominus super tribus sceleribus Edom et super
quattuor non convertam eum eo quod persecutus sit in gladio
fratrem suum et violaverit misericordiam eius et tenuerit ultra
furorem suum et indignationem suam servaverit usque in finem
mittam ignem in Theman et devorabit aedes Bosrae
haec dicit Dominus super tribus sceleribus filiorum Ammon
et super quattuor non convertam eum eo quod dissecuerit
praegnantes Galaad ad dilatandum terminum suum
et succendam ignem in muro Rabbae et devorabit aedes eius
in ululatu in die belli et in turbine in die commotionis
et ibit Melchom in captivitatem ipse et principes eius
simul dicit Dominus
